(22 января) Волжский район Пӧтъял кундемысе «Шочмо вер» ансамбль шочмо калыкшылан У ий пӧлекым ыштен, кугу концертым ончыктен.
Тиде ансамбль шке районыштыжо веле огыл, республик мучко кумдан чапланен. Мурыжо-влакым самырыкшат, илалшыжат йӧратен колыштыт.
«Шочмо вер» лишыл жапыште 35 ияш лӱмгечыжым палемдаш тӱҥалеш. Тудым изинекак музыклан шӱмаҥше, поро, чолга пӧръеҥ Валериян Семёнов 1997 ий гыч вуйлата.
Икоян коллективыште Валериян Семёнов, тудын Татьяна пелашыже, Володя шольыжо, пелашыжын шӱжарже Анфиса Эманова, Эльвира Гурьянова, Рауль Гарифулин, (Рауль — ансамбльын икымше вуйлатышыжын, Анатолий Николаевын, веҥыже). Сценыш моло дене пырля самырык мурызо Родион Григорьев лектын. Тудынат ачаже, Василий Григорьев, ончыч ансамбльыште ударник дене шоктен.
Концерт кум шагат наре шуйнен гынат, ончышо-влакланат, артист-шамычланат ты жап кӱчык татла веле чучын. Калык дене чон почын мутланеныт, ансамбльын историйже дене палдареныт, ты тӱня дене чеверласыше участник-влакым (Анатолий Николаевым, Владислав Яковлевым, Николай Ивановым ) порын шарналтеныт. Нойымым нигӧ шижын огыл. А концертым ончаш Пӧтъял, Корамас, Памашэҥер, Учимсола, Сотнур, Ярамарий, Кожласола, Пӱнчысола, Азъял, Тошнер, Черкысола, Кожласола ялла гыч калык миен. Зал шыҥ-шыҥ темын, садлан кумыланже весела сем почеш верыштак куштен.
— «Мыланем садикте», «Уэш ломбо кӱдынь», «Покшыман йолгорно», «Вучо, вучо маньыч, вучышым» да моло муро дене пырля самырык пагытнам шарналтышна, ик татлан тусо илышыш пӧртылна, — каласкала ансамбльын участницыже А.Эманова. – Ынде у аппаратурым налме, сандене программынам у муро-влак дене пойдараш йӧнна утларак лие. А тыгай мурыжо мемнан ятырак.