(15 января) Республикысе йоча библиотекыште «Почувствуй себя меценатом!» акций мучашлалтын. 2014 ий мучко библиотекарь-влак организаций да посна еҥ-влак деч у йоча книга да журнал-влакым тауштен налыныт.
Библиотеке гыч увертарыме почеш, акцийыш 39 меценат ушнен. Нунын коклаште — Марий Эл Республикын Кугыжаныш Погынжо, «Марийцы Карелии» мер организаций, «Вигс» ООО, Эрик Сапаев лÿмеш опер да балет театрын дирижержо Григорий Архипов. «Синяя птица» гимназийын тунемшыже Оля Чайникова библиотекылан «Вечность в одном ключе» лÿман 14 почеламут сборникшым пöлеклен.
Поро пашашке кугу надырым пыштеныт библиотекын изи лудшыжо-влакат, нунын ача-аваштат да коваштат. Библиотекарь-влакат öрдыжеш кодын огытыл. Акций жапыште 733 савыктышым (412 журналым да 321 книгам) погымо. Тудын кокла гыч пелыже Республикысе йоча библиотекын фондыштыжо кодын. Моло савыктышым республикын районлашкыже пуымо.
«Почувствуй себя меценатом!» акцийыш ушнышо-влаклан тауштымашан серышым кучыктымо. Акцийым иктешлыме нерген да меценат-влакын лÿмыштым «Библиознайка» газетыште савыктыме.
«Кугарня» газетын ответственный секретарьже Ирина Золотарева.