(13 апреля 2017) 7 апрельыште Свердловск кундем Красноуфимск олаште «Российысе марий-влакын федерал калыкле-тӱвыра автономийже» мер ушемын конференцийже эртен.
Тушко Ленинград областьысе «Ший корно», Удмурт да Татарстан Республикласе да Хант-Мансийск автоном округысо Нягань олан марий автономийла гыч делегат-влак лийыныт.
Конференцийын пашаштыже Марий Эл Виктер вуйлатышын икымше алмаштышыже, тӱвыра, печать да калык-влакын пашашт шотышто министрже М.З.Васютин, Оньыжа Э.В. Александров лийыныт.
Мер Каҥашын шошымсо сессийжын участникше-влакат тудын пашашкыже ушненыт.
Конференцийым ФНКА вуйлатышын алмаштышыже О.А.Третьяков вӱден. Чылаже ныл йодышым лончылымо. Мер организацийын сомылжым виктарымаште проект пашан кӱлешлыкше, мер организацийын марий калыкын I Погынжылан 100 ий теммылан пӧлеклалтше мероприятий-влак нерген мутланымаш лийын.
Проектын ик лектышыже — Одо кундемысе калыкле-тӱвыра автономий проект почеш йоча-влаклан «Айдеме-патыр» йомак книгам савыктен.
Конференцийыште «Российысе марий-влакын Федерал калыкле-тӱвыра автономийышт» мер организацийын 2017-2019 ийлан паша планжым пеҥгыдемдыме. Тыгак Мер организацийын исполнительный директоржым сайлыме. Тудым Республикысе марий тӱвыра рӱдерын вуйлатышыже Н.В.Пушкина вуйлаташ тӱҥалеш.
Тюмень кундемысе марий-влакын калыкле-тӱвыра автономийже дене ФНКА эше ик организацийлан ешаралте.
ФНКА вуйлатышын алмаштышыже О.А.Третьяков ден Н.В.Пушкина марий тӱвыра ден йӱлам арален да вияҥден шогымаште кугу надырым пыштымыштлан мер пашаеҥ-влак Владимир Айметовым, Елена Шуматаевам да Борис Александровым мер ушемын Таумутшо дене палемденыт.