(22 октября 2014) Марий Элын Промышленность, транспорт да корно озанлык министерствыже тений май-сентябрьыште тӱрлӧ организационно-правовой да собственность форман промышленный предприятий-влак коклаште эртарыме «Образцово кучымо предприятий» смотр-конкурсым иктешлен.
Тышке изи предпринимательстве пурен огыл. Конкурсыш 13 предприятий ушнен, нуным кок тӱшкалан шелме. Комиссийын пунчалже почеш сеҥышылан тыгай коллектив-шамычым шотлымо: икымше тӱшкаште (500 деч утларак еҥан коллектив) сеҥышылан Йошкар-Оласе «Марбиофарм» ООО-м шотлымо. Козьмодемьянскысе «Потенциал» ООО кокымшо, Йошкар-Оласе «Водоканал» МУП кумшо верыш лектыныт; кокымшо тӱшкаште (500 марте еҥан коллектив) Советский районысо «Ново-Фокинский ликер да арака завод» ООО сеҥен. Звенигово районысо «Красногорскийысе «Электродвигатель» завод» ОАО кокымшо, Оршанке районысо «Марий нефтеперегонный завод» ООО кумшо лийыныт. Смотр-конкурсышто сеҥыше коллектив-влак Марий Эл правительствын I, II, IIIстепенян дипломжо-влак дене палемдалтыт.