(12 марта 2015) Эстонийысе Вильянди олаште 6-7 мартыште «Театр кӱвар» лӱман фестиваль эртен. Тыште Яков Павлович Майоров-Шкетанын «Кок сӱанат пеле» пьесыже почеш шындыме спектакль ончыкталтын. «Кок сӱанат пеле» пьесым эстон йылмыш марий кинорежиссёр Алексей Алексеев кусарен.
Фестивальыште чылажге латвич спектакль ончыкталтын. Жюри Яков Шкетанын «Кок сӱанат пеле» спектакльжым «Эн сылне классикым кусарыме пьесе» лӱман премий дене палемден. Каласен кодыман, марий рвезе Алексей Алексеевын сценыште Сергушын рольжым чоҥымылан «Эн сай пӧръеҥ роль» номинацийыште палемдалтын.«Кок сӱанат пеле» спектакльым Сао гимназийыште тыршыше туныктышо-влак шынденыт. Алексейын ойлымыжо почеш, пьесым кусарыме годым, эстон йылме дене сылне мут-влакым кучылтмо, Яков Павлович Майоров-Шкетанын возымо стильжым арален кодашак тыршыме.
«Кок сӱанат пеле» спектакльым Марий талешке кечын, 26 апрельыште, Таллин олаште ончыкташ шонат.
Яков Павлович Майоров-Шкетанын возымо «Кок сӱанат пеле» пьесыжым марий гыч эстон йылмышке кусарыме нерген Алексей Алексеев видео-интервьюшто каласкала.
Источник: http://kidsher.ru