(5 декабря 2017) Озаҥыште «Музыка многонациональной Казани» фестиваль икымше гана эртен. С.Сайдашев лÿмеш Кугыжаныш Кугу концерт залын (ГБКЗ им.С.Сайдашева) сценыж гыч Озаҥыште илыше тӱрлӧ калыкын семже йоҥгалтын.
Фестивальыш пурышо 50 наре заявке гыч кугу сценыш 12 эн сай коллективын пашажым гына ойырен налыныт. Нунын коклаште Озаҥ оласе «Лай мардеж» марий фольклор ансамбль шке мастарлыкшым ончыктен. Нунын йоҥгалтарыме шӱвыр, тӱмыр да гармонь почеш тошто марий семым, Шернур вел сӱан мурым да Кельмаксола вел йыр мурен куштымашым калык совым рӱж кырен вашлийын! Каласыман, фестивальын чыла номерже Озаҥысе консерваторийын «Tatarica» оркестрын шоктымыж почеш йоҥгалтын.
Фестивальым илышыш шыҥдараш Мэрия города Казани, Ассамблея народов Татарстана, Дом дружбы народов Татарстана, Республиканский центр развития традиционной культуры Республики Татарстана полшеныт.
Фотосӱретыште «Лай мардеж» ансамбльын участникше-влак: Софья Осипова-Шарабуева, Анна Речкина, Александр Славин, Сергей Ефремов.
