(26 марта 2015) Российын сулло, Татарстанын да Марий Элын калык артисткыже, мемнан землячкына Галина Ластовкан (Окунева) эше ик тунемшыже тӱнямбал кӱкшытыш лектын. Влада Боровком Английысе Ковент Гарден королевский опер театрын самырык-влак труппышкыжо налыныт.
Тиде ӱдырын мурымыжым кодшо арняште И.Палантай лӱмеш культур да искусство колледжын концерт залыштыже колышташ пиал логале. Казаньысе Н.Жиганов лӱмеш консерваторийын профессоржо Г.Ластовка молгунамсе семынак шкенжын студентше-влакым конден ыле. Нунын коклаште иктыже — Анна Фомичева — Марий Эл гыч. Ончаш толшо-влак, мутат уке, Боровком эн шокшын вашлийыныт.
— Влада училищыштат тунемын огыл, — рашемдыш концерт деч вара Галина Трофимовна. – Тудын мурымыжым ик гана колынам да йӱкшӧ улмым шижынам. Тыге пашам ышташ тӱҥална, да икмыняр жап гыч теве тыгай виян, йоҥгыдо йӱк лектын шинче. Ӱдырын ончыкылыкшо кугу. Английыште уста режиссер , чапле мурызо-влак воктене лиеш, тунам шкенжын кӱкшытшым эшеат нӧлталеш.
Марий Элыште Владам тиддеч ончычат колышташ йӧн лийын. Кодшо ий мучаште пианистка Ольга Бочкарева ден когыньыштын концертышт лийын. Мурызо тыгак «Белая акация» романс фестивальыште шке мастарлыкшым ончыктен.
Ушештарена, Г.Ластовкан усталык корныжо Казаньысе опер да балет театр дене кылдалтын. Опер солисткым тыгак консерваторийыш ӱжыныт. Тудын тунемшыже Михаил Казаковым эше консерваторийыште шинчымашым погымыжо да мастарлыкым шуарымыж годымак Российысе Кугу театрыш пашаш ӱжыныт. Тиде мурызым «ХХI курымын басше» маныт, тӱнямбалне эн чапланыше сценылаште мурен да мура.
Икмыняр ий ончыч Галина Трофимовна театр гыч каен да шкенжым пӱтынек педагог пашалан пуэн.
— Туныктышын сомылжо куштылго огыл, — ойла педагог. — Йӱк дене кажне кечын пашам ыштыман. Шӧртньым эрыктыме семын тудым кажне кечын эрыктыман, йылгыжтарыман. Студент-влак деч вара кастене шкан мураш ӱнар огеш код.
Г.Ластовкан кызыт латик тунемшыже уло. Марий Эл гыч мийыше-влак чыланат тудын дене заниматлат. Таче Российысе шуко театрыште Ластовкан ямдылыме солист-влак пашам ыштат. Пытартыш ийлаште Э.Сапаев лӱмеш опер да балет театрыш толшо-влак коклаште С.Рябинина ден Л.Добрынинам палемдыман. Кок студентше Китайыште улыт. Кызытат ты эл гыч ик студентше тунемеш.
Тыге марий ӱдырамаш Г.Т.Ластовка Татарстанын да Марий Элын веле огыл, пӱтынь Российын профессиональный искусствыжым вияҥдымашке мурызо да эше педагог семын кугу надырым пышта. Мемнан калыкын шочшыжо шке пашаж дене чынжымак кугешнаш тарата.
С.БЕЛКОВА.
Снимкылаште: Г.Ластовка сценыште мурышо ученикшылан тыге полша; мурызо-студент Влада Боровко.
Д.Речкинын да еш альбом гыч налме фото.